نشر المطرب حمو بيكا مغنى المهرجانات منذ قليل على صفحته الشخصية على موقع "فيس بوك " منشورا يتحدث فيه عن ظاهرة التمنر الذى يتعرض ليها من قبل الجمهور والمطربين الآخرين ونقيب المهن الموسيقية الفنان هانى شاكر وتنمره عليه فى إحدى الندوات .

قال حمو بيكا : يا جماعة ياريت نفهم ان انا موجوع و تعبان ، كفاية تنـمر عليا ، اتنـمر عليا مرة و اتنين و تلاتة و لسه فيه ناس بتتنمر عليا .بتتنمروا عليا لحساب مين انا بني آدم زي زيكم و الله ،

الاستاذ هاني حضرتك كنت في ندوة و اتنـمر عليا و انت اخويا الكبير و انا مسامح و الله بس كفاية بالله عليك،

انا اه مش بعرف اقرا و اكتب بس ربنا خلقلي قلب احس بيه ، كفاية تجرحوني ، مش كل واحد يبقى عنده سلطة يتحكم في البشر .

انا 5 سنين بعاني و بعافر بس هما شايفين ان احنا مبسوطين و فرحانين ، لا انتوا اللي مبسوطين و انتوا اللي معاكم و معاكم كتيييير و عندكم كتيييير بس عمرنا ما بصينالكم .. هو ليه لما يكون معايا حاجه حد يبصلي فيها و عايز يأخدها .

ده غير مرضي اللي بدفعله في الشهر كتير اوي .

حسوا بيا ، لو غلطت في حاجه تعالي و حاسبني و علمني الصح من الغلط .

فاتح بيت و عندي أسرة و عندي مسؤوليات كتير محدش يعلم بيها إلا ربنا.

ارجوكم كفاية ياريت تحكموا بينا بالعدل زي ما ربنا سبحانه و تعالى بيقول : " وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ "

و كفاية تنمر عليا و افتكروا كلام ربنا.

" يَا أَيُّهَا الَّذِينَ آمَنُوا لَا يَسْخَرْ قَوْمٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ " ..

و في النهاية شكراً لكل حد بيدعمني و بيحبني